ក្រុមហ៊ុនប្រឹក្សាយោបល់វិនិយោគបានដើរតួនាទីយ៉ាងក្នុងការទាក់ទាញអ្នកវិនិយោគមកកម្ពុជា ដោយសារអ្វី? គឺដោយសារតែប៉ុន្មានឆ្នាំចុងក្រោយនេះ កម្ពុជាទទួលបានការវិនិយោគផ្ទាល់ពីបរទេស ពិសេស គឺប្រទេសចិន យ៉ាងគគ្រឹកគគ្រេង។ តំណាង ក្រុមហ៊ុនប្រឹក្សាវិនិយោគ បានបញ្ជាក់ថា តាមរយៈការផ្ដល់សេវាប្រឹក្សាវិនិយោគនេះ អាចនឹងណែនាំអ្នកវិនិយោគក្នុងស្រុក និងក្រៅស្រុក មកចាប់ផ្តើមអាជីវកម្មនៅកម្ពុជាបានជោគជ័យ នៅក្នុងវិស័យសក្តានុពលសំខាន់ៗជាច្រើន ជាពិសេសគឺ វិស័យអចលនទ្រព្យ ហិរញ្ញវត្ថុ និងទេសចរណ៍ជាដើម។

ក្រុមហ៊ុន ចេង ហ្វ៊ុង អ៊ិនវេសម៉ិន មានគោលដៅជំរុញការវិនិយោគគ្រប់ទម្រង់ និង គ្រប់ខេត្តក្រុងទាំងអស់នៅកម្ពុជា និងជាដៃគូវិនិយោគដ៏យូរអង្វែង ដើម្បីធ្វើឲ្យអាជីវកម្ម និង ការវិនិយោគអ្នកទទួលបាននូវភាពជោគជ័យ។ ក្រុមហ៊ុននេះ ជាក្រុមហ៊ុនផ្តល់សេវាប្រឹក្សា និងជំរុញការវិនិយោគ និងធ្វើដៃគូ ដោយឈរលើភាពស្មោះត្រង់ និងសុចរិតភាព ដើម្បីកសាងការទំនាក់ទំនងដ៏យូរអង្វែងជាមួយគ្រប់ដៃគូអាជីវកម្មនានា។

កញ្ញា ប៊ុត កេរ៉ាឌី អគ្គនាយិកាក្រុមហ៊ុន ចេង ហ៊្វុង អ៊ិនវេសម៉ិន បានថ្លែងថា មូលហេតុដែលក្រុមហ៊ុនរបស់ខ្លួន សម្រេចចិត្តក្នុងវិនិយោគនៅកម្ពុជា ពីព្រោះ កម្ពុជាបានកំពុងក្លាយជាប្រទេសមួយដែលមានសុខសន្តិភាព និងជាគោលដៅទេសចរណ៍ដ៏ពេញនិយមមួយនៅអាស៊ីអាគ្នេយ៍និងពិភពលោក ខណៈដែលសេដ្ឋកិច្ចកម្ពុជាបានរីកចម្រើន ដោយសារស្ថិរភាពនបាយ និង គោលនយោបាយរបស់រាជរដ្ឋាភិបាល។ ស្ថិរភាពនយោបាយ និង គោលនយោបាយត្រឹមត្រូវរបស់រដ្ឋាភិបាល បានធ្វើឲ្យកម្ពុជាក្នុងរយៈពេល១០ឆ្នាំចុងក្រោយនេះ មានកំណើនសេដ្ឋកិច្ចលឿនបំផុត នៅក្នុងតំបន់អាស៊ីអាគ្នេយ៍ ដែលយើងសង្កេតឃើញថា កំណើនផលិតផលក្នុងស្រុកសរុបជាមធ្យម៧%ក្នុងមួយឆ្នាំ។

កញ្ញ៉ាបានថ្លែងថា៖ “មានមូលហេតុជាច្រើនដែលវិនិយោគិនទាំងអស់ កំពុងផ្តោតមកប្រទេសកម្ពុជា ជាពិសេស គឺ ស្ថិរភាពនយោបាយ ឧកាសវិនិយោគ និងវប្បធម៌ដ៏សម្បូរបែប។ ការកើនឡើងគួរឱ្យកត់សម្គាល់ចំពោះវិនិយោគិនបរទេស ដែលកំពុងស្វែងរកឱកាសវិនិយោគនៅកម្ពុជាលើគ្រប់វិស័យ មានដូចជា វិស័យអចលនទ្រព្យ វិស័យទេសចរណ៍ និង បដិសណ្ឋារកិច្ចជាដើម។ ការអភិវឌ្ឍន៍វិស័យអចលនទ្រព្យនៅកម្ពុជានាពេលបច្ចុប្បន្ន គឺ កំពុងបង្ហាញពីសក្តានុពលដ៏អស្ចារ្យ និងក្លាយជាកន្លែងទាក់ទាញសម្រាប់វិនិយោគិនទាំងឡាយ។ រាល់មូលហេតុខាងលើទាំងនេះ គឺជាការលើកទឹកចិត្តបំផុតសម្រាប់វិនិយោគិនក្នុងការសម្រេចចិត្តវិនិយោគនៅក្នុងប្រទេសកម្ពុជា”។

ទាក់ទងនឹងការសម្ពោធជាផ្លូវការនូវក្រុមហ៊ុន ចេង ហ្វ៊ុង អ៊ិនវេសម៉ិន លោកជំទាវឧបនាយករដ្ឋមន្ដ្រី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច បានមានប្រសាសន៍ថា ក្នុងនាមរដ្ឋាភិបាលកម្ពុជា លោកជំទាវបានអបអរសាទរ និង កោតសរសើរក្រុមហ៊ុន ចេង ហ្វ៊ុង អ៊ិនវេសម៉ិន ឯ.ក និង សង្ឃឹមយ៉ាងមុតមាំថា ក្រុមហ៊ុននេះ នឹងចូលរួមចំណែកអភិវឌ្ឍន៍ប្រទេសកម្ពុជាតាមរយៈការផ្តល់ប្រឹក្សា រកដៃគូ និងណែនាំអ្នកវិនិយោគទាំងក្នុងស្រុក និងក្រៅស្រុក ឲ្យចាប់ផ្តើមធ្វើអាជីវកម្មដោយជោគជ័យលើវិស័យសក្ដានុពលជាច្រើននៅកម្ពុជា ពិសេស វិស័យអចលនទ្រព្យ ហិរញ្ញវត្ថុ និងទេសចរណ៍។

លោកជំទាវឧបនាយករដ្ឋមន្ដ្រី មានប្រសាសន៍យ៉ាងដូច្នេះថា៖ “រដ្ឋាភិបាលមានគោលនយោបាយ ចាត់ទុកវិស័យឯកជនជាក្បាលម៉ាស៊ីនជំរុញសេដ្ឋកិច្ច និង ស្វាគមន៍ដ៏កក់ក្ដៅដល់អ្នកវិនិយោគបរទេសដោយគ្មានប្រកាន់ជាតិសាសន៍ និងកត្តាអំណោយផលផ្សេងទៀត រួមទាំងការលូតលាស់ផ្នែកសេដ្ឋកិច្ចយ៉ាងលឿន ជាពិសេស ខាងពាណិជ្ជកម្ម សំណង់ ទេសចរណ៍ ហិរញ្ញវត្ថុ ទីផ្សារកម្លាំងពលកម្មមានតម្លៃទាប និងច្បាប់វិនិយោគដែលអនុគ្រោះដល់ធុរកិច្ច ទើបកម្ពុជាកំពុងក្លាយជាគោលដៅថ្មីមួយគួរឲ្យចាប់អារម្មណ៍បំផុតពីវិនិយោគិនក្នុងស្រុក និងក្រៅប្រទេស”។

លោកជំទាវមានប្រសាសន៍បន្តថា ក្រុមហ៊ុនដែលមកបណ្ដាក់ទុនវិនិយោគនៅកម្ពុជា មិនមែនត្រឹមតែបានទាក់ទាញទុនវិនិយោគពីបរទេស និង ទាក់ទាញអ្នកទេសចរឲ្យមកកម្សាន្ដនៅកម្ពុជានោះទេ តែថែមទាំងជួយបង្កើនទំនាក់ទំនាក់សេដ្ឋកិច្ច និង ពាណិជ្ជកម្ម រវាងកម្ពុជា និងប្រទេសជាច្រើន ជាពិសេស ប្រទេសចិន ឲ្យកាន់តែរឹងមាំថែមទៀតផង។

សូមបញ្ជាក់ថា ក្រុមហ៊ុន ចេង ហ្វ៊ុង អ៊ិនវេសម៉ិន ជាក្រុមហ៊ុនក្នុងស្រុក ដែលមានសេវាកម្មដ៏ល្អបំផុត ដូចជា សេវាអចលនទ្រព្យ សេវាហិរញ្ញវត្ថុ បដិសណ្ឋារកិច្ច និងសេវាប្រឹក្សាវិនិយោគ៕